O mapa das canas

A metade da poboación de Ourense ten máis de 53,3 anos: é a 29.ª rexión máis envellecida de 1.165 da Unión Europea (2025), e Lugo a 59.ª (52,3). A idade mediana da UE é de 44,9 anos; a de Galicia, 50,0, a 20.ª de 244 rexións NUTS 2. En 2014 Ourense estaba en 50,2.

Eurostat, demo_r_pjanind3 (idade mediana por rexión NUTS 3 e NUTS 2, a 1 de xaneiro de 2014 e 2025) e demo_pjanind (UE-27). Mapa: Eurostat GISCO, NUTS 2024 a escala 1:20 millóns, simplificado. A idade mediana é a que parte a poboación en dúas metades iguais: a metade ten máis anos e a outra metade, menos. Eurostat dá un decimal, así que hai empates e as rexións empatadas comparten posto. As NUTS 3 son en España as provincias e noutros países unidades de tamaño moi diverso (en Alemaña, distritos de poucos miles de habitantes), polo que os extremos dependen en parte desa división. As rexións ultraperiféricas, Chipre e algunhas illas pequenas non se ven no mapa pero si están no ranking. Fundación Galicia Sustentable · Licenza CC BY-NC-SA 4.0.